Kryetari i PD-së, Lulzim Basha deklaroi pasditen e sotme se zgjedhjet e 25 prillit ishin një masakër elektorale, ndërsa fajësoi për këtë kryetarin e PS-së, Edi Rama se ka përdorur para për fushatë dhe blerje votash.
“Ne hymë në këtë betejë jo me një kundërshtar politik, por me një regjim që bëri gjithçka për ta shkatërruar garën e ndershme elektorale. Ata ndryshuan kushtetutën dhe kodin zgjdhor duke thyer të gjithë rregullat. Dhjetëra mijëra vota të pavlefshme, numri më i madh ndonjëherë dhe dy herë më shumë sesa diferenca mes dy palëve. Miliona euro të hedhura për të realizuar blerjen më të madhe industriale të votës duke shkaktuar deformimin më të madh të vullnetit të zgjedhësve.
Ata përdorën milionat e koncesioneve të korruptuara, vodhën të dhënat personale të qytetarëve shqiptarë, përdorën kriminelët dhe bandat, kërcënuan dhe shantazhuan votuesit, administratën, gazetarët dhe median duke e bërë edhe më të madhe masakrën elektorale.”- tha Basha.
Ndër të tjera Basha ka kujtuar edhe kandidimin e PSD me ne krye Tom Doshin duke e akuzuar se po bashkëpunon me Ramën.
“Edi Rama ka bashkëpunuar dhe vazhdon të bashkëpunojë hapur me përfaqësues të krimit si Tom Doshi që kanë gjithë botën demokratike kundër. Ai kandidoi përsëri përfaqësuesit e krimit në listat e tij.”- tha Basha./Opinion.al
