Gjykata e Lartë braziliane vendosi të mërkurën që ish-ylli i futbollit Robinho duhet të vuajë dënimin e tij me 9 vjet burg në vendin e tij, për përdhunim në grup.
Ngjarja në fjalë ndodhi më 22 Janar 2013 teksa braziliani luante për Milanin. Së bashku me 5 persona të tjerë, ata përdhunuan një shqiptare në një klub nate.
Italia kishte lëshuar një urdhër arresti ndërkombëtar për Robinho-n, por ky i fundit i kishte shpëtuar qelisë pasi qëndronte së fundmi në atdhe, në Sao Paulo. Kushtetuta e Brazilit nuk lejon që shteti të ekstradojë qytetarët e saj. Pala italiane kishte bërë kërkesë që ish-futbollisti ta vuante dënimin në Brazil.
Për këtë arsye 9 nga 15 gjyqtarët në Gjykatën Superiore të Drejtësisë në Brazil pranuan këtë kërkesë dhe votuan pro që Robinho të vuajë dënimin në atdhe duke formuar shumicën e thjeshtë të mjaftueshme për të vendosur fatin e ish-futbollistit.
“Brazili nuk mund të jetë një strehë për kriminelët,” tha gjyqtari Mauro Campbell Marques gjatë votimit të tij.
Gjyqtarët përfunduan votimin e tyre në më pak se një ditë.
Vendimi i shpejtë erdhi në të njëjtën ditë që një gjykatë spanjolle vendosi që ylli brazilian i futbollit Dani Alves mund të largohet nga burgu nëse paguan një garanci prej një milion eurosh (1.1 milion dollarë) në pritje të apelimit të dënimit të tij për përdhunimin e një gruaje në Barcelonë.
