Të tjera detaje vijnë pas denoncimit të pazakontë të familjes durrsake, që treguan se vajza e tyre u përdhunua në familjen ku kujdesej për një 10 vjeçar.
Babai i 23vjeçares, Idajet Çoniku tregon momentet e para të përballjes me të bijën në gjendje të rëndë psikike.
“Më 23 gusht u ktheva në shtëpi, pasi kisha mbledhur shishe plastike. Sapo hyra në derë, dëgjova vajzën që qante me të madhe. E pyeta se çfarë kishte, por ajo nuk ishte në vete. Pashë se ajo kishte një shenjë në mjekër, një në afërsi të sqetullës dhe shenja të tjera dhune në kurriz. I qëndrova afër dhe e pyesja që t’ia lehtësoja dhimbjen, por Desara vetëm qante. Pastaj u ngrit e vajti tek i vëllai, që është i paralizuar. Donte ta ngrinte në këmbë, ndërsa i thoshte “çohu e më merr hakun”, tha ai për Gazetën Shqiptare.
