Kryeministri Edi Rama ka patur dhe përballjen e parë me Kreun e Shtëpisë së Bardhë Donald Trump. Kjo është përballja e parë pas deklaratave të forta që Rama ka bërë përpara disa muajsh kur Trump ishte kandidati kryesor i republikanëve për postin që mban sot. “Mos e dhëntë Zoti që Trump të zgjidhet President i SHBA-ve”, shprehej atëherë Rama për CNN.
Kështu përballja e parë ka ndodhur sot, në një ceremoni të shkurtër të zhvilluar në Bruksel, në kuadër të Samitit të NATO-s, ku fokusi ka qenë lufta kundër terrorizmit.
Në shumicën e pamjeve të nxjerra sot nga mediat, Rama shihej i buzëqeshur dhe vazhdimisht tentonte të afrohej tek Merkel dhe Trump, të cilët ishin krahë njëri-tjetrit. Pas përfundimit të konferencës për shtyp ku foli Angela Merkel dhe Donald Trump, liderët politikë i janë drejtuar sallës.
Rama është shfaqur i buzëqeshur përkundrejt Donald Trump dhe Angela Merkel, një buzëqeshje të cilën e ka mbajtur deri në momentin kur kanë hyrë në ndërtesë. Në foto më poshtë shihet edhe ripozicionimi në vende të ndryshme i Ramës teksa shkrepeshin foto me të gjithë liderët e tjerë.
Kujtojmë që deklaratat e Ramës kundër Trump, në atë kohë ende një kandidat për President, u kthyen në objekt diskutimesh të shumta në skenën politike shqiptare dhe me ardhjen e Trump në krye të Shtepisë së Bardhë, në një bumerang për Edi Ramën. /opinion.al
