Ligji për mbrojtjen e konsumatorit po ndryshon rrënjësisht duke u përafruar me ligjet e Bashkimit Europian.
Ministria e Ekonomisë, Kulturës dhe Inovacionit prej gati një muaji e ka hedhur këtë draft të ri për konsultim publik. Zv/ministri i Ekonomisë Enkelejd Musabelliu jep detajet për risitë e këtij ligji.
“Përafron plotësisht të gjitha direktivat dhe rregulloret e Bashkimit Europian në fushën e mbrojtjes së konsumatorit. Specifikisht janë 7 rregullore apo direktiva që transpozohen në mënyrë të plotë në legjislacionin tonë, çka do të bëjë që konsumatori shqiptar, përsa i përket çështjeve të cilësisë së produkteve jo ushqimore, peshës, sasisë e me radhë, do të gëzojë të njëjtën mbrojtje si konsumatorët në çdo vend të BE,” tha Enkelejd Musabelliu, zv.ministër i Ekonomisë, Kulturës dhe Inovacionit.
Drafti parashikon që për herë të parë do të ngrihet edhe Agjencia Kombëtare e Mbrojtjes së Konsumatorit.
“Agjencia e re jo vetëm do të trajtojë rastet e ankesave, por do të ketë edhe të drejtën për të zhvilluar procedura hetimore pa pasur fare ankesë nga konsumatorët, vetëm nga sinjalet që do të vijnë nga tregu. Do të ketë rolin më të rëndësishëm sa i përket mbikëqyrjes së tregut bashkë me Inspektoratin Shtetëror mbi Mbikëqyrjen e Tregut, por edhe për të bërë procedura hetimore, për të marrë masa.”
Ky projektligj rregullon edhe shitjet online, të cilat në vitet e fundit kanë pësuar një rritje të konsiderueshme në vend. Por sipas zv.ministrit, duhet që konsumatorët të kenë faturë tatimore.
“Ligji i konsumatorit zgjeron shumë të drejtat përsa i përket tregtisë online. Pra, konsumatori do të ketë të drejta të zgjeruara për politikat e kthimit të mallit, të ndryshimit, të tërheqjes nga një blerje e caktuar nëse nuk e gjykon të arsyeshme dhe me radhë. Është shumë e rëndësishme që të theksojmë që, për të përcaktuar një mbrojtje, konsumatori shqiptar të blejë një mall me faturë tatimore. Fatura tatimore është prova që vërteton transaksionin mes shitësit dhe blerësit.”
Një tjetër pikë që rregullon ky ligj janë edhe reklamat.
“Roli i agjencisë do të jetë pikërisht ky: të garantojë që reklama që i jepet konsumatorit për një produkt të caktuar të jetë gjithnjë korrekte dhe të mos reklamojë efekte të një produkti, të cilat në fakt nuk janë efekte reale të atij produkti.”
Drafti ofron mbrojtje edhe për furnizimin e shërbimeve digjitale, duke parashikuar në kontrata disa kritere specifike deri dhe te e drejta e dëmshpërblimit të konsumatorit.
Projektligji pritet të miratohet në vjeshtë, pas konstituimit të parlamentit të ri. Klan News
