Do të mbahet sot manifestimi i thirrur nga Presidenti Meta në ‘Bulevardin Dëshmorët e Kombit’ që ka për qëllim siç ka thënë ai ndërgjegjësimin e qytetarëve për të mbrojtur institucionet. Motoja e tij është “Për Republikën, për Kushtetutën, për Kombin, për Unitetin e popullit”.
Presidenti prej javësh i ka bërë thirrje njerëzve se shkeljet e pretenduara nga ai të Kushtetutës nga mazhoranca përbëjnë një ‘grusht shteti’ i cili po tenton të kapë të gjithë institucionet. Për këtë ai ka paralajmëruar se në manifestimin e sotëm do të firmosë edhe dekretin e parë kundër ‘grushtit të shtetit’.
Kuvendi i drejtuar nga mazhoranca dhe Presidenti janë në konflikt prej pothuajse 10 muajsh që vitin e kaluar kur ai kundërshtoi zhvillimin e zgjedhjeve lokale pa opozitën. Tonet mes dy institucionet u ashpërsuan edhe më shumë kur Meta vendosi të anulojë datën e zgjedhjeve dhe nga ana e tij Kuvendi nisi procedurën e parë për shkarkimin e tij, një veprim që ndërmerrej për herë të parë në Shqipëri.
Gjashtë muajt se dytë të vitit 2019 u karakterizuan nga një konflikt që mbetej në distancë. Nga një anë Presidenti kthente për rishqyrtim ligjet e miratuara në Kuvend ndërsa ky i fundit i rrëzonte ato në seancë plenare dhe vijonte hetimet në Komisionin për shkarkimin e Metës.
Përplasja e dy institucioneve do të bëhej më e ashpër gjatë emërimit të anëtarëve të rinj të Gjykatës Kushtetuese. Meta pretendoi se Këshilli i Emërimeve në Drejtësi në bashkëpunim me mazhorancën tentuan ti marrin atij kompetencën për emërimin e një anëtari nëpërmjet procedurave administrative të cilat sipas tij janë kryer në kundërshtim me Kushtetutën. Për këtë Presidenti thirri një protestë më 8 dhjetor. Por tërmeti i 26 Nëntorit do ta ndalonte përkohësisht ‘luftën’ mes dy institucioneve.
Ajo do të rifillonte sërish në Janar. Në Kuvend u propozua dhe më pas u kalua një ndryshim në ligjin e zgjedhjes së anëtarëve të Gjykatës Kushtetuese i cili nuk e bën të detyrueshëm betimin para Presidentit të anëtarëve të rinj të Kushtetueses. Nëqoftëse Presidenti nuk i thërret ata për betim brenda 10 ditëve ata mund t’ia dërgojnë atij betimin me shkrim.
Meta e ka konsideruar këtë akt anti-kushtetues. Në një seri konferencash shtypi prej mesit të shkurtit ai ka denoncuar me dokumente të gjithë procedurën që sipas tij KED, Kuvendi dhe qeveria kanë ndjekur për ti rrëmbyer atij kompetencën e emërimit të anëtarit të Gjykatës Kushtetuese.
Deri tani Meta ka kallëzuar penalisht në SPAK, kreun e KED, Ardian Dvorani, ministren e Drejtësisë Etlida Gjonaj dhe dy zyrtarë të tjerë.
Tubimi i sotëm do të zhvillohet në orën 17:00. Ai do të jetë paqësor sipas atyre që ka thënë Meta ku qytetarët janë ftuar të kenë flamuj në duar dhe mimoza.
“Nesër ka vetëm një gjë rëndësi protesta dhe manifestimi të jetë sa më paqësor, vetëm me flamuj kuqezi, me mimoza meqë po vjen pranvera dhe thirrjet E duam Shqipërinë si gjithë Europa, dhe liri demokraci. Nesër në 2 mars ju pres të gjithëve atje. Rroftë Kushtetuta, rroftë sovrani… poshtë oligarkët.”, tha dje Presidenti Meta. /Opinion.al
