Shërbimi i Inteligjencës së Jashtme të Mbretërisë së Bashkuar (MI6) do të ketë për herë të parë në historinë e tij 116-vjeçare një grua në krye.
BBC njofton se Blaise Metreweli do të marrë drejtimin e agjencisë gjatë këtij viti, si shefe e 18-të e MI6.
Metreweli, e cila iu bashkua MI6 në vitin 1999, aktualisht drejton sektorin e teknologjisë dhe inovacionit të shërbimit.
Ajo u shpreh se është “krenare dhe e nderuar” që i është besuar ky rol.
Kryeministri britanik Sir Keir Starmer e cilësoi emërimin si një “moment historik”, në një kohë kur, sipas tij, “puna e shërbimeve të inteligjencës nuk ka qenë kurrë më jetike se sot”.
MI6 ka për detyrë të mbledhë informacione jashtë vendit për të garantuar sigurinë e Mbretërisë së Bashkuar, me qëllim kryesor luftën kundër terrorizmit, ndërprerjen e veprimtarive të shteteve armiqësore dhe forcimin e sigurisë kibernetike.
Shefi i MI6, njihe ndryshe edhe si “C” dhe është i vetmi anëtar i agjencisë që identifikohet publikisht.
Metreweli, 47 vjeçe, është aktualisht Drejtoresha e Përgjithshme “Q”, duke udhëhequr departamentin që fokusohet në ruajtjen e fshehtësisë së agjentëve dhe zhvillimin e teknologjive për t’u përballur me kërcënime si survejimi biometrik nga Kina.
Metreweli ka studiuar antropologji në Universitetin e Cambridge dhe ka mbajtur më herët pozicione drejtuese edhe në MI5, agjencinë britanike të sigurisë së brendshme.
Shumica e karrierës së saj është përqendruar në Lindjen e Mesme dhe Europë.
