Trajneri i Manchester City, Pep Guardiola është shprehur se skuadra e tij duhet të bëjë një ndeshje të madhe ndaj Liverpool për të vazhduar më tej, në çerekfinale të Champions League.
“Për të kaluar duhet të bëjmë një ndeshje thuajse perfekte, pasi rezultati është i vështirë për t’u përmbysur. Duhet të krijojmë shumë shanse, të jemi cinikë dhe të mbrojmë mirë, portieri të presë gjuajtjet në portën tonë.
Nuk do të kemi kohë të mendojmë sa gola na duhen. Duhet të shënojmë të parin dhe pastaj të mendojmë për të dytin, pastaj të shohim nëse mund të mbajmë të njëjtin ritëm. Duhet të mendojmë se kjo është një lojë e thjeshtë dhe të përqendrohemi në çdo minutë, kjo është ajo që duhet të bëjmë” ka thënë Guardiola.
Ndeshja e parë midis Liverpool dhe Manchester City përfundoi me rezultatin 3-0, ndërsa ndeshja e kthimit do të luhet ditën e martë në orën 20:45.
