Marrëveshja dypalëshe e pensioneve mes Shqipërisë dhe Italisë do tu japi mundësinë qytetarëve shqiptarë, por edhe italianë që të bashkojnë vitet e punës për efekt të përfitimit të pensionit.
Zv/ministrja e Ekonomisë, Kulturës dhe Inovacionit, Olta Manjani, në një intervistë për Klan News tha se ky dakordësim bën të mundur që të mos humbasin vitet e kontributeve dhe shtetasit të përfitojnë pension nga të dyja vendet.
“Zbatimi i marrëveshjes do të hyjë pikërisht në datën 1 Qershor. Të gjithë ata shtetas që kanë punuar këtej dhe matanë kufirit nuk do të humbin asnjë ditë pune nga kontributet e tyre. Numri minimal i viteve për të përfituar një pension në Shqipëri është 15 vite dhe në Itali është 20 vite dhe të gjithë ata shtetas që nuk e plotësonin vitin minimal të përfitimit të një pensioni do të kenë një bashkim të periudhave kontributeve, ku në shtetin përkatës sigurisht do të përfitojë pensionin që është ekuivalent me masën e kontributit”, shprehet zv.ministrja Manjani.
Sipas zëvendësministres Manjani përfitues janë mbi 500 mijë emigrantë shqiptarë në Itali si dhe 4 mijë Italianë që punojë në Shqipëri aplikimin mjafton të bëhet në një prej vendeve.
“Pra nga momenti që shtetasi vendos shtetin ku do të bëjë aplikimin edhe përfitimet do të eksportohen aty pa asnjë kosto shtesë, duke i eleminuar të gjitha kostot me të cilat përballeshin më parë shqiptarët. Në këtë rast kostot do të jenë të gjitha zero për të gjithë shtetasit shqiptarë që vendosin të aplikojnë në Itali, apo italianë që vendosin të aplikojnë në Shqipëri”, tha Manjani.
Një tjetër marrëveshje e rëndësishme për njohjen e pensioneve është edhe ajo me Greqinë ku grupet teknike tashmë i kanë zhvilluar takimet e para.
“Pala shqiptare është shumë gati. Draft marrëveshjen ne e kemi gati dhe presim një sinjal, le të themi një vullnet politik nga ana e shtetit grek për të vijuar më tej me negociatat teknike zyrtarisht. Zakonisht negociatat kalojnë në dy, tre apo në raste të tjera dhe katër raunde”, thekson Manjani.
Deri më tani vendi ynë përfshi dhe Italinë ka nënshkruar 17 marrëveshje për njohjen e kontributeve shoqërore dhe është duke punuar edhe me vende të tjera ku ka prezencë të emigrantëve shqiptarë si Sllovenia, Estonia dhe Moldavia.
Klan News
