Pjesa më e madhe e emigrantëve shqiptarë jetojnë dhe punojnë prej vitesh në Itali dhe Greqi. Por dy shtetet fqinje ende nuk bërë njohjen reciproke të viteve të punës për pension. Pra këto dy shtete nuk njohin vitet e punës që emigrantët kanë kryer në Shqipëri.
Drejtori i Institutit të Sigurimeve Shoqërore, Astrit Hado tha në një intervistë për ABC se prej disa vitesh qeveria shqiptare ka zhvilluar dhe finalizuar marrëveshje me disa shtete të ndryshme për njohjen e kontributit të pensioneve të mijëra emigrantëve shqiptarë, por jo me Italinë dhe Greqinë.
“Të gjithë qytetarët shqiptarë që kanë një periudhë vjetërsie pune në Shqipëri dhe kanë emigruar e punojnë në vende të tjera, në qoftë se nuk plotësojnë 15 vjet vite pune në Shqipëri, hyn në lojë instrumenti i marrëveshjeve qeveritare. Ne aktualisht kemi marrëveshje me disa shtete: Turqi, Gjermani; Hungari; Rumani; Maqedoni; Luksemburg; Belgjikën, të cilat janë në fuqi. Më 1 dhjetor fillon dhe zbatohet dhe marrëveshja me Austrinë. Janë gati dhe dokumentat për tu nëndhkruar me marrëveshjen me Zvicrën, nga pikëpamja teknike është e realizuar e gjitha. Në të njëjtën situatë është dhe marrëveshja me Kanadanë”, u shpreh ai.
Nga ana tjetër kreu i ISSH tregoi se në çfarë faze jemi në lidhje me procesin për marrëveshjet me Greqinë dhe Italinë, vende në të cilat jeton pjesa më e madhe e emigrantëve shqiptarë.
“Për sa i përket fillimit të një marrëveshje me Greqinë dhe me Italinë gjërat janë pak më ndryshe. Me palën greke, për hir të së vërtetës nuk është se kemi një zhvillim të ri. Me palën italiane janë bërë disa takime të karakterit teknik për fillimin e negociatave, por jemi akoma në pritje të dakortësisë apo reagimit të palës italiane”, tha Hado
