Dy marrëveshje mes Shqipërisë dhe Greqisë, që së shpejti pritet të miratohen, do t’u vijnë në ndihmë emigrantëve shqiptarë në shtetin grek.
Në takimin me emigrantët shqiptarë në Athinë, Kryeministri Edi Rama u dha lajmin e mirë të marrëveshjes së pensioneve dhe rinovimin e lejeve të qëndrimit me marrjen e shtetësisë greke.
“Më në fund me qeverinë aktuale se me ato më përpara as nuk bëhej fjalë, kemi arritur të çelim negociata në nivel ekspertësh për marrëveshjen e pensioneve me Greqinë. Po ashtu, kemi hapur edhe dialogun dypalësh në nivel teknik për problematikën e lejeve të qëndrimit dhe procedurën e marrjes së shtetësisë me natyralizim dhe ka goxha progres dhe jam besimplotë që shumë shpejt do merrni lajme shumë të mira”.
Kryeministri Edi Rama foli edhe për projektet e përbashkëta mes Shqipërisë dhe Greqisë në të cilat po punohet.
“Një tjetër synim i përbashkët strategjik dhe i dakordësuar mes dy qeverive është bashkërendimi i nevojave dhe oportuniteteve evropiane të dy shteteve në tregun e integruar evropiane të energjisë.
Një tjetër faqe e bukur bashkëpunimi dhe afrimi, për ta integruar duke bërë një integrim ndërkufitar për Parkun Kombëtar të Vjosës që vitet e ardhshme do jetë motor i industrisë së turizmit por duke u kthyer në një park evropian të integruar ku s’ka kufij po triumfon natyra që na bashkon qysh se kemi ardhur në këtë botë, do jetë shembull magnetik qoftë për çfarë mund të bëjmë së bashku me njëra-tjetrën për njëra-tjetrën, qoftë për turistët nga e gjithë bota. Shqipëria 2023 do ketë fituar pavarësinë e vetë të plotë energjetike. Asnjë qindarkë më nga taksat e shqiptarëve nuk do shpenzohet për të blerë energjinë jashtë”.
