Gjykata e Tiranës ka lënë në burg 5 të arrestuarit e parë për rrëmbimin dhe vrasjen e Jan Prengës. Arrest me burg u dha për Bajram Hajrin, Leonard Hajrin, Olsi Turjan, Elton Hajrin, si dhe për Festim Bexhdilin.
Bajram Hajri, djali i tij, Leonard Hajri, Olsi Turja dhe Elton Hajri u arrestuan gjatë operacionit të së hënës, që forcat RENEA zhvilluan në rrethinat e Shijakut, mes të cilëve edhe babai e vëllai i Altin Hajrit.
Ky i fundit është shpallur në kërkim dhe cilësohet si kreu i grupit, ndërsa mbi katër personat e arrestuar rëndojnë akuzat për mbajtje peng të personit dhe armëmbajtje pa leje. Ndërkohë, Festim Bexhdili i arrestuar në Kavajë, akuzohet për fshehje dhe asgjësim kufome.
Policia shqiptare dyshon se vlonjati Dritan Rexhepaj, i cili vuan një dënim në Amerikën Latine për 240 kilogramë kokainë, ka urdhëruar rrëmbimin e 49-vjeçarit.
Konflikti dyshohet se ka lindur për një ngarkesë kokaine, që dyshohet se u nis nga Amerika Latine për në Britani dhe ku Rexhepaj është i përfshirë.
49-vjeçari Prenga u mor peng, dhe u dhunua për vdekje më 17 janar, në Kamëz, ndërsa pak ditë më parë policia konfirmoi vdekjen e tij. Deri më tani nuk është arritur që të gjendet trupi i viktimës, ndërsa kërkimet janë shtrirë në zonën e Shijakut./ Opinion.al
