Mes 39 lojtarëve nën moshë të regjistruar në mënyrë të parregullt, sipas FIFA-s, nga Real Madrid, janë edhe fëmijët e Zinedine Zidane. Dhe trajneri i “Los Blancos”, i cili do të ketë përsëri në dispozicion Cristiano Ronaldo-n pas dëmtimit, ka folur edhe për këtë në konferencë për shtyp: “Nuk e kuptoj, – ka thënë Zidane. – Klubi do të kërkojë të bëjë më të mirën e mundshme. Fëmijët e mi kanë jetuar gjithë jetën e tyre këtu, është absurde që nuk mund të luajnë futboll”.
Pavarësisht lajmit se Real Madrid nuk do të mund të bëjë dot merkato për dy sesionet e ardhshme, Zidane mund të buzëqesh për faktin se do të ketë në dispozicion Cristiano Ronaldo-n për ndeshjen e ardhshme kundër Osasuna-s: “Kanë kaluar 60 ditë nga ndeshja e fundit, – ka thënë tekniku francez, – duhet t’i japim pak kohë, por nesër do të luajë. Jam shumë i kënaqur me organikën që kam në dispozicion, kam shumë alternativa”.
Në lidhje me masat e marra nga FIFA kundër Real dhe Atletico Madrid ka folur edhe trajneri i Barcelona-s, Luis Enrique: “Kur kjo masë është marrë ndaj Barcelona-s kam thënë se ka qenë e padrejtë dhe vazhdoj ta kem këtë mendim. Gjithsesi, ata kanë një ekip të madh, por unë shpresoj që të mos marrin të njëjtat rezultate që kemi marrë ne pas ndëshkimit të FIFA-s”, ka thënë trajneri duke iu referuar “Tripletës” së arritur nga Barcelona në 2015-ën.
