Shqipëria do të blejë dy mjete ajrore specifike për luftën kundër zjarreve. Lajmi është dhënë nga ministri i Mbrojtjes Niko Peleshi në përfundim të mbledhjes së qeverisë.
Gjithashtu, Peleshi tha se do të ngrihet një kamp trajnimi për zjarrëfikësit dhe gjitha strukturat operacionale që duhet të trajtohen në fushën e mbrojtjes civile.
“ Pjesë e kësaj kredie është parashikuar të jetë blerja e dy automjeteve ajrore specifike për luftë kundër zjarreve, pra për periudhën e vështirë gjatë verës që sa vjen bëhet dhe më e nxehtë fatkeqësisht dhe sa vjen ka dhe më tepër vatra zjarri, ju e mbani mend që gjithmonë, gjatë Gushtit ne jemi në luftë në të gjithë Shqipërinë, për fat të keq vitet e fundit nuk shpëton asnjë bashki nga 61 bashkitë tona, nga vatrat e zjarrit, do të shtojmë dy mjete ajrore që nuk i kemi patuar më parë në për këtë qëllim.
Gjithashtu do të ngrihet një kamp trajnimi për zjarrëfikësit dhe gjitha strukturat operacionale që duhet të trajtohen në fushën e mbrojtjes civile, duke përfshirë dhe vullnetarët, urgjencat mjekësore, policinë e shteti dhe forcat e armatosura. Kjo qendër trajnimi do të jetë e pajisur edhe me laboratorë simulimi të situatave të ndryshme, pra le të themi që me këtë financim, ne kompletojmë, e ngremë në një nivel shumë të lartë gjithë sistemin dhe rrjetin e mbrojtjes civile në vendin tonë”-tha Peleshi.
