Ministri Niko Peleshi në një komunikim për mediat ditën e sotme në ambientet e kryeministrisë, bëri me dije se 2 satelitë do t’i bashkohen flotës për monitorimin e territorit.
Gjatë fjalës së tij Peleshi foli për disa nga përdorimet specifike të satelitëve ndwrsa gjithashtu tha se kjo kontratë kap vlerën e 6 mln dollarëve.
“Sot do të nënshkruhet kontrata e Shërbimit Satelitor në fushën e mbrojtjes dhe sigurisë, për monitorimin me teknologji të avancuar të territorit të Shqipërisë. Kjo kontratë ka vlerën 6 mln dollarë. Konsiston në përdorimin ekskluziv të dy satelitëve për një periudhë 3-vjeçare, për monitorimin e territorit dhe zhvillimit të kapaciteteve teknike. Shqipëria do të ketë akses prioritar dedikuar në dy nga satelitët, që pritet t’i bashkohen flotës të Satellogic, lëshimit të ardhshëm satelitor me Space X, që do të quhet Albania 1 dhe Albania 2. Ky shërbim do u ofrojë institucioneve përfituese marrjen e imazheve satelitore.”-tha Peleshi.
Më tej Peleshi shtoi: “Disa nga përdorimet specifike janë: Agjencia Kombëtare e Mbrojtjes Civile do të marrë informacion mbi rrëshqitjet e tokës, sipërfaqet e zonave të përmbytura apo djegura, rrugët e bllokuara, trashësia e borës etj., në mënyrë që të marrë masa; Policia e Shtetit do të marrë informacion për kultivimin e bimëve narkotike, prerjen e paligjshme të pyjeve dhe parandalimin e akteve kriminale; Ministria e Bujqësisë do të marrë informacion për burimet ujore, hidrovorët dhe lumenjtë; Ministria e Turizmit do të marrë informacion mbi cilësinë e ujërave; Ministria e Energjisë do të marrë informacion për rezervat e gazit dhe naftës, si dhe infrastrukturën rrugore”.
.
