Eksperti i sigurisë Avenir Peka duke analizuar situatën e luftës mes Rusisë dhe Ukrainës, e konsideroi atë një luftë proxy, që në fakt zhvillohet mes Kinës dhe SHBA.
“Kjo luftë nuk është për t’i dhënë rrugëdalje Putinit. Duhet të shkojmë përtej Ukrainës. Ukraina është një shesh beteje, por nuk është vendi për të cilin bëhet lufta. Është një luftë proxy, që zhvillohet mes dy kampeve në një terren të caktuar. Është ndër rastet e para në historinë botërore që një luftë proxy zhvlillohet në dy nivele. Në Ukrainë zhvillohet përplasje mes Rusisë dhe perëndimit, kryesisht SHBA. Pra nga njëra anë ke një luftë proksi që është mes Rusisë dhe Ukrainës, Por nga ana tjetër është SHBA- Kinë, përmes Rusisë.
Beteja e madhe është midis perëndimit dhe Kinës. Në këtë aspekt duhet parë konteksti i luftës. Çfarë ka kërkuar Putini, çfarë nuk i është dhënë? Pse e ka kërkuar me domosdoshmëri pikërisht tani? Pse kishte dy ultimatume që ishin ekstremis para luftës dhe pse ky qëndrim i perëndimit? Nëse flasim për t’i lënë Rusisë një rrugëdalje, unë besoj se nuk do i lihet një rrugëdalje e tillë. Pse duket se ka një përplasje në sipërfaqe mes presidentit Zelensky që në një farë mënyre është i gatshëm për të diskutuar kushtet e një paqeje, por që SHBA veçanërisht nuk janë fort në favor të kësaj. Lufta në Ukrainë nuk është për Ukrainën, është shumë e gjerë se Ukraina. Fatkeqësia është që kur zihen dy elefantë shkelet bari. Edhe synimi i Rusisë nuk është vetëm Ukraina, apo statusi neutral i saj. Është më i gjerë”, tha Peka./Opinion.al
