Vijon edhe këtë të premte protesta e pedagogëve, e cila shënon sot ditën e pestë radhazi të protestave.
Mëngjesin e sotëm pedagogët janë mbledhur tek Korpusi i Politeknikut, duke vijuar me kërkesat drejtuar qeverisë, një nga të cilat është rritja e pagave.
Ndërkaq, gjatë tubimit kreu i sindikatës së pedagogëve njoftoi se të hënën në orën 11:00 do të zhvillojnë një protestë të përgjithshme me pedagogët në të gjithë vendin.
“Të hënë në orën 11:00 protestë kombëtare, ku të gjithë pedagogët dhe studentët i ftojmë të jenë këtu dhe të diskutojmë. Le të kthehet ky peticion si një nismë për ndryshimin e situatës në universitete. Kërkojmë autoriteteve të dekanateve që të mbledhin Asambletë dhe të vendosin mbi mënyrën si ata do mbajnë qëndrim ndaj peticionit. Kërkojmë nga përfaqësuesit e studentëve të mblidhen dhe të diskutojnë për realizimin e këtij peticioni që kërkesat të kenë impakt të përbashkët si te pedagogët ashtu dhe tek studentët’, u shpreh kreu i Sindikatës së Pedagogëve, Sandër Kovaçi.
