Edhe këtë të hënë, pedagogët kanë zhvilluar protestë përpara Korpusit Universitar, për plotësimin e kërkesave të tyre nga ana e qeverisë.
Në fjalën e tij, kreu i sindikatës së pedagogëve, Sandër Kovaçi ka paralajmëruar se të mërkurën do ta përshkallëzojnë protestën në grevë urie.
Ai u shpreh se qeveria ka dy ditë afat për të plotësuar kërkesat e tyre.
“Ne këtë betejë e kemi filluar prej 3 vitesh por e kemi intensifikuar 2 muajt e fundit. Qeveria ka treguar se nuk ka veshë për të dëshmuar apo sy për të parë gjendjen e universiteteve tona, ofron gjithmonë zgjidhje makiazh pa e shoqëruar me vendime konkrete. Së fundmi është vënë me initimidim dhe presione që të shuhet kauza jonë e drejtë. Është propozuar që të kalohet në formën e grevës së urisë dhe që në këtë fazë mund të bëjë të ndërgjegjësojë opinion e brendshëm dhe atë ndërkombëtar që të dëgjohet kauza jonë. Kërkoj miratimin për këtë akt të padëshirueshëm, por të nevojshëm me një ngritje dore. I lëmë kohë deri të mërkurën për të zgjedhur zgjidhje të gjithë të mërkurën të jemi këtu në orën 16:00 për solidarizim ndaj të gjithë atyre që kanë marrë përsipër këtë akt sakrifice”, tha Kovaçi.
Kujtojmë se, që prej nisjes së vitit akademik, pjesa më e madhe e pedagogëve të universiteteve publike ka bojkotuar mësimin, duke protestuar për rritje të rrogës me 50% brenda dy viteve dhe rritje të financimeve për kërkime shkencore.
Ndërkohë, qeveria ka refuzuar plotësimin e kërkesave duke vendosur rritje me 15%, të ndarë në 7% nga buxheti i shtetit dhe 8% nga të ardhurat e universiteteve./Opinion.al
