Pedagogët e Fakultetit të Shkencave Sociale, ashtu siç kishin paralajmëruar kanë nisur grevën duke bojkotuar proçesin mësimor, deri në një periudhë pa afat.
Jashtë ambienteve të fakultetit ka dhe studentë të cilët janë lajmëruar që do të zhvillohet mësim, por pedagogu Arlind Qorri e hedh poshtë këtë mundësi pasi sipas tij ditën e premte Asambleja e Fakultetit të Shkencave Sociale ka vendosur bojkotin e proçesit mësimor dhe nisjen e një greve pa afat.
Sipas tij vendimi i marrë me 36 vota pro, është i detyrueshëm, sepse është një vendim i marrë nga shumica e organit më të lartë vendimarrës së fakultetit, duke shtuar se kush shkel grevën shkel ligjin, statutin e Universitetit të Tiranës dhe bën një veprim të turpshëm.
Ky sqarim u bë dhe ditën e djeshme nga asambleja, pasi në faqen zyrtare të Fakultetit të Shkencave Sociale ishin publikuar dy dokumente në kundërshti me njëri-tjetrin ku në të parin shpallej vendimi i pedagogëve për grevë, e më pas një skemë e rifillimit të mësimit.
Pedagogët e Fakultetit të Shkencave Sociale kërkojnë plotësimin e kërkesave të tyre që kanë të bëjnë me anullimin e disa VKM të miratuara së fundmi nga qeveria dhe anullimin e ligjit për Arsimin e Lartë./E.M
