Partia për Drejtësi, Integrim dhe Unitet kërkon hapjen dhe rinumërimin e të gjitha kutive të qarkut të Tiranës.
Kërkesën e saj, partia e Shpëtim Idrizit e bëri pas rinumërimit të disa kutive në KQZ, që sipas PDIU-së provojnë që ka parregullësi në numërim.
“Duke parë që u provua ajo që ne kërkonim, që ka parregullësi në këto qendra, kërkojmë që të rinumerohen të gjitha kutitë e Tiranës”, thuhet në deklaratën e PDIU-së.
KQZ reagoi duke deklaruar se kjo kërkesë do të diskutohet pas përfundimit të rinumërimit të 72 kutive.
E ndërsa në KQZ po rinumërohen kutitë e fundit, PDIU vazhdon të mbetet me vetëm pak vota më shumë se më 25 qershor.
Kujtojmë se mandati i Idrizit në Tiranë është humbur në zgjedhjet e 25 qershorit për vetëm 37 vota, mirëpo PDIU dhe Idrizi në krye pretendojnë se u janë vjedhur votat.
Megjithatë pavarësisht rinumërimit, diferenca e votave deri më tani nuk është shumë e madhe dhe Idrizi duket se po mbetet jashtë Parlamentit.
