Partia Demokratike ke reaguar pas djegies së dy automjeteve në pronësi të kryetares së kësaj force politike në Ulëz, Gjelina Kalthi. Sipas kësaj force politike, zonja Kalthi nuk ka konflikt me askënd në Ulëz.
“I vetmi shkak i këtij sulmi banditesk është fakti se me këto dy makina, familja Kalthi ka ardhur në Tiranë për të marrë pjesë në protestë, duke shoqëruar edhe qindra qytetarë të tjerë protestues nga Ulza. Postblloqet policore në rrethin e Matit kanë identifikuar makinat si “transportuese” të protestuesve nga Mati në Tiranë dhe mbrëmë, në mes të natës, si hajdutë e banditë, kanë realizuar aktin kriminal. PD dënon ashpërsisht këtë akt qartësisht politik dhe banditesk. Ai është një akt që as do ta harrojmë, as do ta falim”, theksohet në një reagim për mediat.
Paraprakisht dyshohet që zjarrvënia të jetë e qëllimshme. Në vendin e ngjarjes ka shkuar policia, e cila nisi provat për identifikimin e autorëve. Kalthi do të merret në pyetje nga hetuesit. Vetë zonja Kalthi ka thënë se ndihet e rrezikuar për jetën e saj./ Opinion.al
