Ditën e djeshme policia e shtetit deklaroi se nuk do të lejonte të mbahej asnjë tubim nga parti politike ose shtetas gjatë fundjavës. Kjo u argumentua me faktin se duhej respektuar heshtja zgjedhore dhe se kjo gjë është e parashikuar në kushtetutë.
Megjithatë, ish-deputeti i PD, Oerd Bylykbashi ka denoncuar vendimin e Policisë së Shtetit dhe Bordit të Monitorimit te Mediave në KQZ. Sipas tij këta të fundit i kanë paralajmëruar të gjitha mediat për të mos transmetuar asnjë aktivitet politik gjatë heshtjes zgjedhore. Por kjo gjë sqaron Bylykbashi vlen vetëm për subjektet që marrin pjesë në zgjedhje dhe për askënd tjetër.
Të njëjtin argumentim ai përdor kundër vendimit të policisë për të mos lejuar tubime. Qytetarëve, thotë përfaqësuesi i PD, i mohohet kështu e drejta e tyre kushtetuese. Po ashtu dhe refuzimi për ti dhënë Partisë Demokratike leje për tubim bie në kundërshtim me kushtetutën pasi ajo nuk është parti e regjistruar në këto zgjedhje. /Opinion.al
