Partia Demokartike është larguar nga mbledhja e Këshillit të Legjislacionit që po zhvillohet në Kuvend dhe po diskutohet zgjatja e mandatit të vetingut. Në një dalje për mediat, kreu i Grupit Parlamentar të PD-së, Alfred Rushaj ka komentuar këtë situatë. Ai tha se mazhoranca nuk ka rënë dakort që të trajtojë së bashku ndryshimet kushtetuese të zgjatjes së afateve të vettingut dhe ndryshimet që propozon PD, por kërkon që t’i trajtojë ato veçmas.
“Këtu po flitet për një konsensus që ka nevojë për të dyja palët, por nuk bihet dakord për të shtyrë dy ditë një mbledhje ku do të diskutohen këto ndryshime. Se kur i mbaron rroga 14 rrogave që merren me vettingun nuk është prioritet i shqiptarëve. Ne themi jemi gati t’i diskutojmë pasnesër sa kohë diskutohen në tërësi ndryshimet kushtetuese, mazhoranca refuzon. Po propozohen ndryshimin e disa neneve të një ligji dhe ne kërkuam që pasnesër të hapet diskutimi dhe të vijohet normalisht me kalendarin, por PS do t’i diskutojë nismat e ndara, e palogjikshme”, tha Rushaj.
