Kryesore

PD thirrje Ramës: Hiq dorë nga kërcënimi i protestuesve


               Publikuar në : 15:54 - 12/02/19 |
b.f

Më herët gjatë ditës, Policia i bëri thirrje politikës, që të heqë dorë nga retorika e thirrjeve destabilizuese që mund të cënojnë rendin publik, gjatë protestës së 16 shkurtit.

Në një deklaratë për shtyp, Sekretari i Përgjithshëm i PD-së, Gazmend Bardhi i bëri thirrje kryeministrit Rama që “të heqë dorë nga çdo kërcënim dhe destabilizim”, në lidhje me protestën e lajmëruar nga opozita më 16 shkurt.

“Rama të heqë dorë nga çdo faktor destabilizues dhe kërcënues. Policia po përdoret politikisht për protestën. Ftoj shqiptarët të bashkohen kundër çdo kërcënimi që vjen qeveria”, u shpreh Bardhi.

Bardhi theksoi se PD do të garantojë çdo qytetar për sigurinë e tij në protestën e 16 shkurtit.

“Shqiptarët do t’i bashkohen protestës së 16 shkurtit pasi e dinë mirë se kriminelët dhe bandat janë me Edi Ramën në qeveri dhe jo mes protestuesve. Ne do të protestojmë si njerëz të lirë dhe me dinjitet. Paralajmërojmë policinë e Shtetit të Edi Ramës të rrijë larg protestuesve, të mos pengojë lëvizjen e lirë të tyre përndryshe secili prej shërbëtorëve të skenarit kriminal të Edi Ramës do të mbajë përgjegjësi personale dhe ligjore. Në Shqipëri ka vetëm një skenar destabilizimi, ai është skenari i Edi Ramës për të qeverisur bashkë me krimin e organizuar”, deklaroi Bardhi.

 

 

 

Pas