Politikë

PD: Të shkarkohet Albert Dervishaj, bashkëpunoi me sigurimin për 10 vite


Bëhu pjesë e Grupit Zyrtar të Opinion.al
>> KËTU <<
               Publikuar në : 17:09 - 28/08/20 |
Opi Nion

Partia Demokratike ka deklaruar se Albert Dervishaj, i emëruar një ditë më parë në pozicionin e Zv.Drejtorit të Përgjithshëm të Policisë së Shtetit, ka qenë bashkëpunëtor i sigurimit.

Në një deklaratë, ish-deputeti Enkelej Alibeaj ka thënë se  numri dy i policisë ka bashkëpunuar me Sigurimin e Shtetit për 10 vite dhe për këtë arsye duhet të shkarkohet nga detyra.

“Zëvendës drejtori sapo emëruar nga Edi Rama në krye të Policisë së Shtetit, Albert Dervishaj rezulton të jetë bashkëpunëtor i Sigurimit të Shtetit në periudhën e diktaturës. Numri dy i Policisë ka bashkëpunuar me Sigurimin e Shtetit për 10 vite. Sipas të dhënave, Albert Dervishaj, është rekrutuar nga Sigurimi në datën 24.08.1981 me numër regjistri 7559.  Punëtori operativ që e ka tërhequr në bashkëpunim ka qenë Ali Anadolli dhe është mbajtur në bashkëpunim nga punonjësi operativ Qirjako Prifti. Këto fakte ekzistojnë në regjistra të agjenturës, kartela dhe procesverbale”, tha Alibeaj.

Duke kujtuar edhe rastin e vetingut për Zv. Drejtorin Gjovalin Loka gjithashtu i akuzuar për lidhje me sigurimin, Alibeaj tha se këta njerëz katapultohen nga Sandër Lleshaj dhe Rama në kundërshtim me ligjin.

“Rasti i Dervishajt, është i dyti brenda pak ditësh që zbulohet si ish-sigurims dhe që militon në kupolën drejtuese të policisë së shtetit.

Disa ditë më parë, organet e vettingut në polici, mbyllën sytë, shkelën ligjin dhe manipuluan faktet, sipas të cilave zevëndësdrejtori aktual i Policisë së Shtetit Gjovalin Loka, rezultoi zyrtarisht i dokumentuar si anëtar aktiv i Sigurimit të Shtetit dhe në shkelje flagrante të ligjit u konfirmua në detyrë. Ligji i vetingut, qartazi e parashikon se anëtarësia në radhët e Sigurimit të Shtetit është kusht i mjaftueshëm që subjekti duhet të largohet nga radhët e Policisë së Shtetit.

Është tronditës fakti se si njerëz të cilët kanë shërbyer Sigurimit të  Shtetit katapultohen nga Edi Rama dhe Sandër Lleshaj në krye të Policisë së Shtetit, duke sfiduar hapur ligjin. Policia e Shtetit nuk mund të jetë kurrsesi një organizatë e kontrolluar dhe e drejtuar nga bashkëpunëtorët dhe agjentët e Sigurimit të Shtetit, në shërbim të Edi Ramës dhe lidhjeve të tij kriminale. Albert Dervishaj duhet të shkarkohet menjëherë dhe qytetarëve ku duhet kërkuar ndjesë publike për këtë thyerje flagrante të ligjit”, ka thënë Alibeaj./Opinion.al

 

 

 

 

Pas