TIRANË- Partia Demokratike ka denoncuar sot ministrin e Shëndetësisë, Ilir Beqaj, duke e akuzuar për korrupsion me barnat. “Për të favorizuar importuesit e tyre, Beqaj dhe Rama futën në listën e ilaçeve të rimbursueshme 30 principe të reja, pikërisht duke e ditur se kush i ka dhe kush i tregton këto barna”. Kështu deklaroi sot nga selia e PD, deputetja Albina Deda. Sipas PD, 30 përqind e barnave të listës së rimbursueshme kushtojnë nga 50 deri në 150 përqind më shtrenjtë.
“Rritjen e çmimit të barnave e ka sjellë ndërhyrja e Qeverisë në treg me interesa klienteliste. Importuesit që i kanë magazinat plot me ilaçe që u duhen qytetarëve, por që nuk janë pjesë e klientelës, nuk u lejohet tregtimi pasi agjensia kombëtare nuk i pais ato me pullë. Kjo bwhet për ti hapur rrugën miqve e donatorëve”, tha më tej Deda. Si pasojë e këtyre politikave klienteliste janë larguar 2 kompani prestigjioze ndërkombëtare, Glakso dhe Actavis. Tani po importohen barna me cilësi dhe origjinë të dyshimtë nga Turqia si; Avastinë dhe Altuzan.
Të gjitha barnat e futura në listën e rimbursueshme në mënyrë të kundraligjshme, i janë dhënë paketë një klienti të qeverisë “Inkomed”, i cili i sjell ato nga Turqia dhe jo nga prodhuesit origjinalë.
