Vendimi i Gjykatës së Krimeve të Rënda për Saimir Tahirin ka treguar se drejtësia është e pashpresë sipas Partisë Demokratike. Dënimi i Tahirit me 5 vite burg për shpërdorim detyre dhe jo për akuzat e trafikut të drogës dhe krimit të organizuar është sipas PD-së dëshmi se “Saimir Tahiri dhe Edi Rama dhe janë një” dhe se ky i fundit “mban peng drejtësinë.
Në një deklaratë për mediat Sekretari i Përgjithsëm i PD-së, Gazment Bardhi theksoi se ata kishin paralajmëruar se çështja Tahiri ishte teatër pasi kryeministri Rama kishte ndihmuar në prishur dosjen hetimore.
“Në dy vjet Edi Rama ka bërë veprime konkrete në këtë drejtim.
- Nuk lejoi prokurorinë të arrestonte që në fillim Saimir Tahirin, duke mos i hequr imunitetin në parlament dhe duke i dhënë mundësi atij të prishë provat.
- Shkarkoi Prokurorin e Përgjithshëm, që kërkoi arrestimin e Tahirit dhe, nëpërmjet Arta Markut, largoi prokurorët e dosjes Tahiri.
- Ekstradoi në mënyrë të paligjshme financierin e bandës së Habiljave, duke i mbyllur gojën për paratë që banda kishte shpërndarë tek pushteti.
- Mbylli çështjen e Orest Sotës, mikut të Saimir Tahirit, në makinë e të cilit u gjetën 863 mijë euro në të njëjtën kohë, kur prokuroria bëri kontroll në shtëpinë e Saimir Tahirit.
- Ushtrojë presion mbi gjykatën për të mos dënuar dhe burgosur Saimir Tahirin, pas kërcënimit që ky i fundit i bëri me dosjet e korrupsionit dhe lidhjes me krimin” deklaroi Bardhi.
Ai shtoi gjithashtu se Tahiri siguroi paprekshmërinë e tij pasi ka materiale të cilat tregojnë për përfshirjen e vëllait të kryeministrit në trafik droge.
“Saimir Tahiri doli i paprekur nga drejtësia, sepse Edi Rama është peng i dosjeve të korrupsionit dhe i lidhjeve kriminale të tij dhe të familjes së tij. Saimir Tahiri posedon faktet e përfshirjes së Olsi Ramës në trafikun ndërkombëtar të drogës me laboratorin e kokainës në Xibrakë, prandaj “imazhi i Shqipërisë në Europë” nuk ka asnjë rëndësi për Edi Ramën” tha Bardhi. /Opinion.al
