Policia e Dibrës ka shpërdoruar detyrën, dhunuar liritë e qytetarëve dhe ka dëmtuar rëndë imazhin e organeve të administratës tek publiku. Këto shkelje janë faktuar në raportin e Avokatit të Popullit.
Kjo është sinteza e asaj që ka deklaruar sot Xhemal Gjunkshi në emër të Partisë Demokratike në një deklaratë për mediat.
Zgjedhjet e 30 qershorit në Dibër u shoqëruan me dhunë ndaj qytetarëve dhe mbështetësve të opozitës nga ana e policisë, denoncon Gjunkshi. Këto akte janë faktuar gjithashtu në raportin e Avokatit të Popullit.
Në deklaratën e tij ish-deputeti i PD tha se Avokati i Popullit ka ngritur shqetësimin se policia ka kryer arrestime “pa prova, jo në flagrancë dhe u ka kontrolluar banesën jashtë afateve ligjore” dhe ndërkaq nuk janë marrë as masat për “t’u siguruar të keqtrajtuarve nga policia mundësinë e eskpertimeve mjeko ligjore”.
Këto përbëjnë shkelje të rënda të të drejtave të njeriut. Por Partia Demokratike shton se gjatë kësaj periudhe policia ka konsumuar vepra penale si “Shpërdorimi i detyrës, duke dëmtuar rëndë besimin e publikut tek këto organe të administratës publike”.
Duke ju referuar raportit të Avokatit të Popullit, vihet në dukje se të arrestuarit nuk janë dërguar përpara gjykatës në datën e kërkuar prej saj. Pra siç thotë PD në deklaratën e saj “oficerët e policisë gjyqësore kanë mashtruar për kohën e arrestimit të qytetarëve për të mbuluar shkeljen flagrante të ligjit” dhe kanë “refuzuar t’iu binden urdhrit të Gjykatës për të çuar para gjykatës të ndaluarit”
E gjithë kjo ngjarje sipas Partisë Demokratike ka përgjegjës kryeministrin Edi Rama në bashkëpunim me ministrin e Breshëm Sandër Lleshaj.
“Partia Demokratike siguron çdo qytetar se shkelësit e ligjit, ata që kanë guxuar të ngrenë dorën dhe të nëpërkëmbin dinjitetin e qytetarëve vetëm se ata kërkojnë të drejtat e tyre kushtetuese, do të përgjigjen para drejtësisë. Ne nuk harrojmë! Ligji ka për të vepruar me ashpërsinë më të madhe ndaj banditëve me dhe pa uniformë në Dibër dhe në të gjithë Shqipërinë!” mbylli deklaratën e tij Gjunkshi. /Opinion.al
