Partia Demokratike kishte paralajmëruar se Edi Rama do të emërojë Kryeprokurorin e ri për të bërë lëvizjen e disa prokurorëve që kanë çështje të rëndësishme si dhe për ndikuar hetimet. Pa kaluar 10 ditë nga mbërritja e Arta Markut në zyrën e Kryeprokurorit ndodhën lëvizjen e para. Kështu u largua Rovena Gashi nga njësia e Dekriminalizimit dhe Petrit Fusha nga Prokuroria e Tiranës.
Partia Demokratike ka reaguar ashpër duke thënë se Edi Rama u hakmor ndaj prokurores Gashi e cila hetoi deputetet me të shkuar kriminale dhe kërkoi heqjen e mandatit. Rasti i fundit ishte ai i deputetit Aqif Rakipi.
Më poshtë deklarata e plotë e PD-së
Kapja politike e Prokurorit të Përgjithshëm nga Edi Rama, pasi kthimit të pasaportës për Saimir Tahirin, dha sot një tjetër efekt.
Kryeprokurori Edi Rama shkarkoi drejtuesen e Sektorit të Dekriminalizimit në Prokurorinë e Përgjithshme, Rovena Gashi, dy ditë pasi, në zbatim të ligjit të dekriminalizimit, zonja Gashi i kërkoi Komisionit Qendror të Zgjedhjeve ndërprerjen e mandatit për deputetin e Elbasanit, Aqif Rakipi.
Shkarkimi i prokurores Rovena Gashi, e cila e drejtoi Sektorin e Dekriminalizimit që në krijimin e tij, është hakmarrje direkte e Edi Ramës për llogari të aleatit dhe mikut të tij, Aqif Rakipi.
10 ditë pas emërimit politik të Prokurorit të Përgjithshëm, në shkelje të hapur me Kushtetutën, u faktua mashtrimi i madh i Edi Ramës, argumenti kryesor i të cilit ishte se Prokurori i Përkohshëm nuk kishte asnjë kompetencë thelbësore për të lëvizur prokurorët apo për të ndikuar në mbylljen e dosjeve.
Skema e Edi Ramës në mbrojtje të aleatëve të tij kriminelë është e qartë.
Kur drejtësia kërkon arrestimin e Saimir Tahirit, Edi Rama e kap drejtësinë, kur ligji zbatohet për të larguar kriminelët nga parlamenti, Edi Rama godet ata që zbatojnë ligjin.
Që sot, me shkarkimin e prokurores Rovena Gashi si hakmarrje për Aqif Rakipin, krimi ka filluar të godasë shtetin përmes shtetit!
