Partia Demokratike dorëzoi sot kërkesën për tu regjistruar si subjekt zgjedhor në KQZ. Ajo ç’ka pritet me shumë interes është lista e kandidatëve për deputetëve. Burimet i thanë Opinion.al se atyre po u jepet dora e fundit dhe nesër në darkë (e premte, 26 Maj) do të dorëzohen në KQZ. PD përpiqet të jetë hermetike deri në momentin e fundit, duke mos nxjerr asnjë informacion zyrtar lidhur me kandidatët për deputetë dhe sidomos ata që kanë emrin në një vend të sigurt.
Mësohet se pjesë e listës së PD-së, do të jetë edhe aleatët, si Mediu, Shehi dhe Ndoka.
Dashamir Shehi duke dalë nga selia e PD-së tha sot se “LZHK nuk do të regjistrohet si subjekt në vete në KQZ dhe do të ketë 2 apo 3 emra në listën e PD-së”.
Me gjasë vetë Shehi do të jetë në Tiranë dhe në vend të sigurt. Po kështu edhe Mediu që tashmë është pjesë e komisioneve ad-hoc të Vetingut ka një vend të sigurt në listat e PD-së.
Ajo që mbetet për tu parë është nëse do të jenë Majlinda Bregu dhe Eduard Halimi në listat e PD, duke qenë se janë deputetë që nuk e kanë mbështetur Bashën.
Ndërsa sot njoftoi largimin nga politika dhe nga listat e deputetëve, një nga politikanët më të vjetër, Genc Ruli. /Opinion.al
