Deputetja e Partisë Demokratike, Dhurata Çupi, ka reaguar në lidhje me 11.7 tonët e akulloreve kancerogjene që janë konsumuar nëpër pikat e ndryshme të shitjes në Shqipëri.
Nëpërmjet një postimi në rrjete sociale, Çupi shkruan se investigimi i bërë nga mediat përmes 5 kompanive të ndryshme në Tiranë zbuloi se akulloret përmbanin eneterobaktere dhe stafilokok, deri në 10 herë më shume sesa normat e lejuara. Ndër të tjera Çupi thotë se kjo situatë është e rrezikshme veçanërisht për fëmijët.
Postimi i plotë i Dhurata Çupit:
Korrupsioni masiv në veprimtarinë e Autoritetit Kombëtar të Ushqimit ka sjellë pasoja të rënda për shëndetin e popullsisë.
Plot 11. 7 ton akullore me përmbajtje kancerogjene (oksid etileni në stabilizuesin lygomme) janë konsumuar nga fëmijët e të rriturit në muajt e fundit në Shqipëri.
Alarmi për akulloret u dha disa javë më parë nga BE pasi kompania prodhuese kishte konstatuar përmbajtjen kancerogjene në disa prej produktet e saj duke njoftuar tërheqjen nga tregjet e Bashkimit Europian.
Qeveria, AKU reagoi me vonesë ndaj kësaj situate duke bërë që produktet e rrezikshme të futeshin në vend, dhe një pjesë e mirë e tyre të konsumohen.
Po ashtu, një investigim i Qendrës “Alert” përmes 5 kampionëve të ndryshme në Tiranë ka zbuluar se akullore artizanale rezultojnë me eneterobaktere dhe stafilokok, deri në 10 herë më shume sesa normat e lejuara.
Ndryshimet e shpeshta të drejtorëve gjobvënës të AKU, emërimet politike jo profesionale, praktikat korruptive të inspektimeve për sy e faqe, kanë sjellë në këtë situatë të frikshme për familjet. Nuk kanë siguri për konsumimin e produkteve.
Siguria ushqimore, në kushtet e importit të lartë të produkteve, është parësore.
