PD ka reaguar pas deklaratës e zëvendës ministrit të Brendshëm, Besfort Lamallari i cili tha se opozita po përgatitet për dhunë në protestën e së hënës. (LEXO LAJMIN KÊTU)
Sekretari i Përgjithshëm i PD-së, Gazment Bardhi në një konferencë për mediat tha se ajo deklaratë nxit dhunën.
“Deklaratat e Ministrisë së Brendshme se Partia Demokratike ka prodhuar dhe ka shpërndarë bomba molotov për protestën e sotme janë një sajesë e neveritshme, që synojnë përplasje, konflikt dhe frikë tek qytetarët. Partia Demokratike ka thirrur sot një marshim proteste të gjithë qytetarëve kundër dhunës, për Shqipërinë si gjithë Europa”, theksoi zoti Gazment Bardhi.
Po ashtu ai pati dhe një përgjigje për parullën ndaj ambasadorit të OSBE-së në Tiranë, veprim për të cilin kanë reaguar të gjitha ambasadat duke i kërkuar liderëve të opozitës të distancohen nga dhuna.
“Është e dënueshme çdo përpjekje propagandistike e qeverisë për ta kundërvënë Partinë Demokratike me partnerët tanë, si në rastin e mbishkrimeve në banesën e ambasadorit të OSBE-së. Ne i kërkojmë prokurorisë të zbulojë kush janë autorët e këtij akti të shëmtuar dhe t’i vërë ata përpara përgjegjësisë”, theksoi Bardhi./ Opinion.al
