Partia Demokratike përmes një konference për mediat nga selia blu reagoi për raportin e“Transparency International”, për vendet e Ballkanit Perëndimor, ku thuhet se kapja e shtetit në këto vende po pasuron politikanët.
Ish-deputetja Jorida Tabaku tha se korrupsioni qeveritar ka marrë përmasa shqetësuese. Sipas saj dy janë elementët kryesorë që “Transparency International”, nënvizon për Shqipërinë: mosndëshkimi për korrupsionin e nivelit të lartë dhe ligjet e miratuara nga qeveria.
Tabaku thekson se ligjet preferenciale si ai i Korporatës së Investimeve, ligji special për teatrin, janë qartazi shembuj të kapjes së shtetit.
“Korrupsioni qeveritar, shkaktar për rrënimin e përditshëm të ekonomisë së çdo familje shqiptare, ka marrë përmasa shqetësuese ndërkombëtare. Organizata e specializuar për këtë çështje, “Transparency International” ngre alarmin se gjatë qeverisjes së Edi Ramës në këto 7 vjet është ngritur një sistem korruptiv, që mund të konsiderohet si kapje e shtetit!“Transparency International” tregon se korrupsioni është rritur si rezultat i vetëm i vullnetit politik të Ramës, që ka shkatërruar ekonominë, ka rritur kostot e jetesës dhe na mban peng tek oligarkët dhe larg Bashimit Europian. Analiza e detajuar e “Transparency International” del në të njëjtin përfundim si opozita dhe pjesa më e madhe e shqiptarëve, se qeveria shqiptare është thjesht zëdhënësja e oligarkëve, klientëve dhe e krimit. “Sundimi i ligjit është i minuar vazhdimisht. Motivimi kryesor është kapja e shtetit për përfitime private. Kjo çon në shpërdorim të gjerë të detyrës publike “– thuhet në raport. Dy janë elementët kryesorë për Shqipërinë: mosndëshkimi për korrupsionin e nivelit të lartë dhe ligjet e bëra sipas dëshirës. Ligjet preferenciale si ai i Koorporatës së Investimeve, ligji special për teatrin, ligjet që ulin taksa për sektorë si minierat, ndërkohë rrisin taksat për 97% të bizneseve janë qartazi shembuj të kapjes së shtetit.
Ligji i Lojërave të Fatit që kjo mazhorancë e mbrojti dhe promovoi ishte një qokë për bizneset e lojërave të fatit pranë qeverisë. Një ligj që nuk ndihmon rregullimin por avantazhon padrejtësisht këto grupe. Siç pohohet edhe nga organizatat ndërkombëtare pohojnë, ky është ligj që ka favorizuar pastrimin e parave në Shqipëri”, tha Tabaku.
Ndërsa, ish-deputeti Enkelejd Alibeaj është shprehur se raporti hodhi dritë mbi lidhjet e kryeministrit Edi Rama me krimin.
“Raporti i Transparency International ka hedhur dritë edhe në anën më të errët në lidhjet e Ramës me krimin. Në 7 vjet ai nuk ka punuar për qytetarët, por për vete dhe organizata kriminale qe kanë ndihmuar të blejë vota. Raporti konfirmoi pikë për pikë gjithçka ka denoncuar PD në këto vite. Dako që Rama mburret se e ka mik, Saimir Tahiri.
Raporti vë në dukej atë që e quan performancë të dobët të prokurorëve në rastin e Gjiknurit. Raporti ka disa lajme të këqija për qytetarët, por ka edhe një lajm të mirë. Askush në Shqipëri nuk beson më te Edi Rama, këtë e vërtetuan edhe revoltat. Qytetarët kërkojnë ndryshimin”, tha ish deputeti./Opinion.al
