Partia Demokratike ka reaguar pas deklaratave të kryeministrit Edi Rama sot në Farkë për situatën e zjarreve në vend.
Deputeti, Tomor Alizoti, e quajti fjalën e Ramës “propagandë të neveritshme” që përmbys të vërtetën për t’iu shmangur përgjegjësive.
Teksa falenderon partnerët euro-atlantikë dhe Kosovën për ndihmën Alizoti thekson se forcat e armatosura u përballën me mjete rrethanore në situatën me zjarret.
“Sot, qytetarët dëgjuan edhe njëherë propagandën e neveritshme që prej shumë kohësh përmbys të vërtetën, për t’iu fshehur përgjegjësive dhe për ta shitur dështimin si sukses. Është e qartë për të gjithë, braktisja e forcave të ushtrisë dhe skuadrave të emergjencave civile. Ata u përballën me zjarret me mjete rrethanore ndërsa Rama, shëtiste me helikopterin që duhej të ndihmonte në përballjen me zjarret.
Mirënjohje partnerëve tanë euro-atlantikë dhe Kosovës, pa ndihmën e të cilëve dhe pa vullnetin e personelit të ushtrisë dhe emergjencave, të braktisur dhe lënë në mëshirë të fatit, kostot e keqmenaxhimit, paaftësisë dhe korrupsionit të këtij regjimi, do të ishin edhe më të frikshme për qytetarët dhe pasurinë tonë natyrore.
E domosdoshme që ligji të veprojë kundër zjarrvënësve, por edhe më rëndësishme që përpara ligjit të japin llogari ata që kanë shpërdoruar me detyrën dhe me korrupsionin e kudondodhur të këtij regjimi, të cilët janë zjarrvënësit e financave publike dhe fatkeqësia e qytetarëve shqiptarë”, shkruan Alizoti.
Më herët, Rama foli për një proces modernizimi të Emergjencave Civile, që sipas tij ka nisur dhe do të vazhdojë.
“Ne do bëjmë atë që duhet për të rritur edhe pagën. Që nuk do jetë asnjëherë e mjaftueshme, por është një motiv më shumë, jo vetëm për të çuar në shtëpi më shumë të ardhura, por për të ndjerë edhe respektin për punën që bën”, tha Rama. Kreu i qeverisë nuk i kurseu superlativat për ministrin e Mbrojtjes Niko Peleshi./Opinion.al
