Partia Demokratike ka përsëritur edhe sot apelin drejtuar kryeministrit Rama të tregojë burimin e 80 mijë dollarëve, me të cilat sipas saj, u ble fotoja e tij me Obamën. Nënkryetari i PD-së, Edi Paloka theksoi gjatë një dekarate nga selia blu se, prej një jave Edi Rama gjendet nën akuzë se ka financuar një krim federal në Amerikë, dhe ai nuk jep asnjë shpjegim.
“Bilal Shehu, taksisti i New Jersey e ka pranuar se 80 mijë dollarëshi që ka paguar në fushatën e Obamës, për ti mundësuar Ramës një takim dhe një foto me presidentin amerikan, i ka ardhur nga jashtë. Nga një burim i huaj. Nga Shqipëria. Edi Rama është nën detyrim të bëjë transparencë, se nga dolën këto para. Kush është burimi i tyre? Dyshimet janë për para droge ose aktiviteti kriminal, cka e rëndon edhe më shumë pozitën e Edi Ramës në këtë skandal”, tha Paloka.
“Nëse ato janë para droge dhe trafiqesh, paratë e atyre trafikantëve me të cilët Rama erdhi në pushtet, kemi të bëjmë me një krim edhe më të madh, dhe çështja duhet zbardhur sa më shpejt. Edi Rama është përfituesi i drejtpërdrejtë i 80 mijë dollarëshit që u pagua nga një burim i huaj. Dhe është ai që duhet të përgjigjet: Nga vijnë këto para? Kush është burimi? Kush është pagatori, kush është ky donator i Edi Ramës? A janë para të ligjshme, apo të aktiviteteve kriminale? Sa më shumë struk kokën e nuk përgjigjet për këto pyetje, aq më shumë rëndohet akuza ndaj tij, aq më shumë bëhet e besueshme se Edi Rama financoi një krim federal në amerikë me para të pisëta”, deklaroi kreu i grupit te PD, Edi Paloka.
