PD: Rama gënjeu në emisionin “Opinion”

TIRANË- Deputeti Luçiano Boçi nga selia e PD-së tha se Kryeministri Edi Rama gënjeu gjatë intervistës me Blendi Fevziun, të enjten në emisionin Opinion. “Afera me CEZ duhet të zbardhet, edhe pse Rama përpiqet ta mbyllë. Marrëveshja e famshme ka bërë që të dy palët të kenë imunitet të mos hetohen”, u shpreh ai. Më tej Boçi tha se Rama nuk e do hetimin ndërkombëtar sepse kërkon t’i vërë kapak vjedhjes së shekullit. “Çështja do të zbardhet paratë do t’u kthehen shqiptarëve”, thekson deputeti demokrat.

Boçi më pas sjell një pjesë të intervistës së Fevziut me Ramën.
Fevziu: Në raportin e studios avokatore franceze thuhet në datën 30 nëntor 2012 që duhet hapur kalëzim penal ndaj stafit ekzekutiv të CEZ dhe në marrëveshjen tuaj të 2014 nuk lejohet të hapet padi ndaj asnjërit prej pjestarëve të CEZ.
 
Rama: Po të përsëris që nuk ka asnjë kufizim. Më dëgjo me vëmëndje sepse është turp që merrni llokume këtej e bëni ballokume andej. Nuk ka asnjë kufizim. Ajo është një kontratë mirëkuptimi siç janë të gjitha zgjedhjet me marrëveshje për palët. Ndërkohë prokuroria e Shqipërisë nuk është palë. Nuk ka asnjë detyrim prokuroria nga kjo marrëveshje. Nuk ka lidhje. Çështjet penale nuk i ka në dorë as CEZ dhe as ne.

Deputeti i PD më tej publikon një pjesë të marrëveshjes së Qeverise me CEZ që fakton sipas ti të kundërtën e asaj që tha Rama në Opinion.

6.2 Midis Datës së Nënshkrimit dhe Datës së Përmbushjes, asnjë Palë nuk do të ndërmarrë hapa armiqësore, veprime apo kufizime ndaj ndonjë Pale tjetër, Dege apo të Punësuarve të saj, në mënyrë të veçantë nuk do të fillohet asnjë procedim, gjykim, arbitrazh apo procedurë tjetër nga ndonjë Palë kundër Palës tjetër, Degës apo të Punësuarve të saj.
9.5. Pa ndikuar në ndonjë detyrim tjetër të përcaktuar sipas kësaj Marrëveshjeje, duke përfshirë, pa u kufizuar, detyrimet për dëmshpërblim sipas nenit 7 të kësaj Marrëveshjeje, në rast se ndonjë nga Palët Shqiptare vihet në dijeni të ndonjë procedimi ligjor nga një Palë Shqiptare kundrejt Grupit CEZ i cili përbën një Pretendim Përkatës, këto procedime do të përfundohen menjëherë.
10.2. Pa cenuar nenin 15.1 më poshtë, Palët Shqiptare angazhohen që asnjë prej Degëve të tyre nuk do të ngrejë ndonjë pretendim apo do të paraqesë apo vazhdojë ndonjë procedim në lidhje me ndonjë Pretendim Përkatës në ndonjë juridiksion kundër Grupit CEZ.
11.2. Palët Shqiptare angazhohen që as ato dhe as ndonjë prej Degëve të tyre nuk do të nxisin apo shkaktojnë (përveç kur kërkohet me ligj) apo të asistojnë ndonjë palë të tretë për të paraqitur ndonjë pretendim apo të fillojnë apo vazhdojnë, në çdo juridiksion, ndonjë procedim në lidhje me ndonjë Pretendim Përkatës.