Partia Demokratike akuzon kryeministrin Rama se nuk po zbaton porositë e Organizatës Botërore të Shëndetësisë duke e rënduar kështu më shumë situatën e koronavirusit.
Ish-deputetja Albana Vokshi në një deklaratë të sajë thotë se teksa OBSH ka i ka përsëritur thirrjen qeverive për të testuar sa më shumë individë, në Shqipëri sipas saj kjo nuk po ndodh.
Vokshi thotë Edi Rama po ndjek një taktikë të gabuar duke kontribuar në përhapjen e virusit në një numër më të lartë qytetesh të vendit. “Duke mos i testuar, duke mos i gjurmuar rastet e dyshuara, trajtimi dhe izolimi i virusit është bërë më i vështirë” thotë ish-deputetja.
Reagimi i Albana Vokshit
Organizata Botërore e Shëndetësise (OBSH) përsëriti thirrjen që Qeveritë të testojnë sa më shumë persona të dyshuar. Testoni, gjurmoni, trajtoni, izoloni
OBSH thotë se kjo është mënyra e vetme për të ulur trendin e frikshëm të përhapjes së virusit COVID 19 në vende të ndryshme të botës. Fatkeqësisht, qeveria shqiptare nuk po i zbaton kërkesat e OBSH. Cila është situata në Shqipëri? Javën e fundit rastet e të prekurve janë rritur ndjeshëm por jo numri i testeve.
E enjte: 32 teste, 5 raste. E premte: 35 teste, 6 raste. E shtunë: 46 teste, 6 raste. E diel: 33 teste, 13 raste. E hënë: 45 teste, 15 raste. E martë: 74 teste, 19 raste. E mërkurë: 111 teste, 23 raste.
Edi Rama po ndjek një taktikë të gabuar, duke kontribuar në përhapjen e virusit në një numër më të lartë qytetesh të vendit. Duke mos i testuar, duke mos i gjurmuar rastet e dyshuara, trajtimi dhe izolimi i virusit është bërë më i vështirë. Pjesa më e madhe e personave të infektuar kanë shkuar në spital në gjendje kritike shëndetësore dhe në rrezik për jetën. /Opinion.al
