Partia Demokratike përmes ish-deputetit Enekelej Alibeaj ka akuzuar kryeministrin Edi Rama se vendimi i fundit i qeverisë për rihapjen e kazinove bëhet në interes të krimit të lidhur me të.
Alibeaj deklaroi se “edhe pse ligji e ndalon shprehimisht hapjen e kazinove në zonat që nuk janë shpallur si me rëndësi kombëtare për turizmin, Edi Rama ka vendosur që ta injorojë këtë gjë.”
Sipas tij “rikthimi tek projekti kriminal i kazinove dhe bixhozit është një nga tradhtitë më të mëdha që Edi Rama u ka bërë qytetarëve për llogari të krimit të organizuar. Pasi flaku në rrugë mbi 10 mijë persona të punësuar në bizneset e lojërave të fatit, Edi Rama ka vendosur t’i përqendrojë ato në pak duar. Edi Rama ka shkelur premtimin që ju bëri shqiptarëve se nuk do të lejonte që lojërat e fatit të shkatërronin mijëra familje dhe jetë njerëzish. Lotët e krokodilit për familjet që mbeteshin pa bukë se kryefamiljari luante bixhoz, janë tharë tani, pak muaj para zgjedhjeve, kur në ortakëri me krimin ka marrë vendim qeverie në cilat kulla dhe në cilat rrugë në Tiranë lejohet hapja e kazinove.”
Më tej përfaqësuesi i PD, për llogari të kujt u mor vendimi për hapjen e kazinove. Ai foli për takime të kryeministrit Rama me eksponentë të krimit për të cilat kërkoi i SPAK-ut që të hetojë.
“Takimet e javëve të fundit me eksponentë të krimit të organizuar janë një indicie e mjaftueshme që SPAK të zbulojë dhe hetojë një nga skemat më të zeza të Edi Ramës me botën e krimit. Vetë Edi Rama, i cili deklaroi dy vjet më parë se deputetët e tij ishin kërcënuar nga burgu 313 për të mos ndaluar lojërat e fatit, duhet t’u përgjigjet pyetjeve pa u fshehur pas heshtjes fajtore. Për llogari të cilëve të burgosur tek 313-ta po mbush qendrën e Tiranës dhe ish bllokun me kazino? A përfitojnë nga ky vendim i marrë në fshehtësi ndonjë nga personat që ka takuar 2 netë më pare apo gjatë javëve të fundit? A është lejimi i kazinove pjesë e pazarit të mbyllur me shokët e përgjimeve të Vangjush Dakos? Sa më shumë të heshtë Edi Rama për këto pyetje, aq më i kapur është nga krimi.”/ Opinion.al
