ARRSH njoftoi sot se ditën e nesërme do të nisin punimet në disa segmente të autostradës Tiranë-Durrës. Në njoftim u tha se punimet parashikohen të mbarojnë me datë 19 shkurt. Këtë Partia Demokratike e ka komentuar si pjesë e skenarit të kryeministrit Rama për të penguar protestën e paralajmëruar me 16 shkurt nga opozita.
Gazment Bardhi, sekretar i përgjithshëm i PD-së: Po paralajmërojmë që tani çdo kompani ndërtimi që të mos nxjerrin në rrugë asnjë makineri dhe të mos bëjnë asnjë veprim që cënon lëvizjen e lirë të protestuesve drejt Tiranës! Përndryshe fati i tyre është i njohur! Qytetarët do t’i heqin pengesat me mënyrat e tyre, njësoj siç bënë banorët e Unazës së Re! Për çdo pasojë që sjell zbatimi i këtij skenari që pengon protestën e 16 Shkurtit, Edi Rama do të jetë i vetmi që do të mbajë përgjegjësi.
Demokratët thonë se përmes makinacioneve qesharake për bllokimin e rrugëve kombëtare, kryeministri Rama tregon se është nën panik e frikë nga revolta popullore e së shtunës./E.L
