Është shoqëruar sërish me debate Komisioni Hetimor për zgjedhjet e 25 Prillit. Përplasje ka patur mes përfaqësuesit të LSI në Komision, Petrit Vasili dhe kryetarit të komisionit, Enkelejd Alibeaj.
Shkak u bë propozimi i socialistit Petro Koçi që në rendin e ditës të ndryshohej togfjalëshi vazhdim i miratimit të rregullores me togfjalëshin shqyrtim i miratimit të rregullores.
Ky propozim u aprovua nga anëtarët e Partisë Demokratike, ndërsa Vasili tha se rregullorja dhe katër nene janë miratuar tashmë në parim dhe mbledhja e sotme nuk mund të jetë kurrësesi një shqyrtim, por vazhdim i asaj që është miratuar më përpara.
Pjesë debati:
Petro Koçi: Përderisa ne të gjithë që ne kemi një informacion që ka një konsensus në lidhje me procedimin e mbledhjes, propozoj që në pikën tre të rendit të ditës të hiqet fjala “vazhdimi” dhe të vendoset fjala “shqyrtimi”.
Enkelejd Alibeaj: Jeni dakord me propozimin e zotit Koçi për të zëvendësuar fjalën vazhdim me fjalën shqyrtim! Po miratohet.
Petrit Vasili: Ore të bëj një pyetje. Që t’i kemi të qarta edhe miratimi në parim nuk qëndron, po apo jo? Ky është moment për t’u sqaruar se këtu u bë pazari i gjësë.
Nëse është votuar në parim ky është vazhdim, nëse ka rënë dhe ai votim në parim unë po ngrihem po iki, në kuptimin e mirë të fjalës.
Enkelejd Alibeaj: Ka qenë votimi në parim, ka qenë unanim, por votimi nen për nen nuk shkoi deri në fund. Për ta zgjidhur ngërçin unë kam bërë një gjest kalorsiak që duhet të bëjë gjithsecili.
Petrit Vasili: Ore Një minut. Ore nuk jemi këtu ne për të akomoduar psikopatira. Ne po themi që votim në parim dhe katër nene kanë pasur dakordësi, atëherë ecim më tutje. Keni frikë nga kjo?
Enkelejd Alibeaj: Nuk ka lidhje me frikën ka të bëj me gjetjen e një gjuhe të përbashkët.
