Partia Demokratike ka përkujtuar ngjarjen e 2 prillit në Shkodër, që quhet edhe si masakra e fundit e komunizmit në Shqipëri.
Në fjalën e mbajtur sot, Lulzim Basha tha se Partia Socialiste është trashëgimtare e atij regjimi, duke bërë thirrje për rrëzimin e qeverisë si mënyra e vetme për të shkulur të keqen nga vendi.
“S’ka vegla të verbra, as gaz lotsjellës, as hafije, as aparat shtypës, që të mund të rikthejë qetësinë e kufomës politike të Rilindjes, trashëgimtares së denjë të krimit të 2 prillit 1991. Protesta madhështore e shkodranëve dhe gjithë shqiptarëve ka vetëm një përfundim, të njëjtin përfundim që pati protesta e 2 prillit dhe sakrifica e katër bijve më të mirë të Shkodrës, rrëzimin e dikaturaës, triumfin e lirisë, triumfin e demokracisë. Për Shqipërinë është kujtesë e përhershme që rrënjët e së keqes nuk thahen nëse nuk i shkulim njëherë e mirë. Sot, Shkodrës dhe Shqipërisë po ia merr ajrin një mostër që rritet nga indiferenca dhe tolerimi. 2 prilli si bashkëjetese e krimit me qeverinë ka sot fytyrën e krerëve të qeverisë, ka sot dorën e zezë që përgjak qytetet tona. Ka sot vulën e emigracionit, ka sot Kuvendin e Krimit dhe kuvendin e denjë trashëgimtar të 2 prillit”, tha Lulzim Basha gjatë fjalës së tij.
Më 2 prill 1991 katër të rinj humbën jetën gjatë protestave kundër manipulimit të zgjedhjeve të 31 marsit të po atij viti./Opinion.al
