Deputeti i PD-së, Luçiano Boçi, të enjten, nxori të dhëna të tjera në lidhje me udhëtimet jashtë vendit të Taulant Ballës me narkotrafikantin Edmond Bego.
Boçi paraqiti disa të dhëna, duke treguar se Taulant Balla dhe Edmond Bego kanë udhëtuar bashkë me datë 7 korrik të vitit 2014, duke hedhur kështu poshtë deklaratën e të mërkurës në studion e emisionit ‘Opinion’.
Balla tha se ka njohur në vitin 2015 Begon dhe ka udhëtuar me të vetëm njëherë jashtë vendit.
Boçi: Taulant Balla u shfaq para shqiptarëve si peng i krimit dhe parave të pista. Pasi përdori fëmijët e tij për të justifikuar miqësinë me një trafikant ndërkombëtar droge, kësaj radhe përdori fenë për të mashtruar shqiptarët për kohën e njohjes me Edmond Begon.
Nuk është e vërtetë që Taulant Balla është prezantuar me Edmond Begon në vitin 2015 në Xhaminë e Dragosturjës.
Dokumentat zyrtare vërtetojnë se ata kanë udhëtuar disahere me makinë dhe avionë në të njëjtën orë përpara vitit 2015. Të dhënat e sitemit TIMS, provojnë se Balla dhe Bego kanë udhëtuar bashkë në 7 korrik 2014.
