Bashkëkryetarja e Komisionit të Reformës Reformës Zgjedhore, Rudina Hajdari deklaroi se opozita jashtëparlamentare nuk solli asnjë propozim të ri në mbledhjen e sotme.
Hajdari shprehet se pavarësisht se shtynë mbledhjen e kaluar dhe trumbetuan ndryshimin e sistemit, opozita jashtëparlamentare nuk e do këtë ndërsa nga ana tjetër PS është e hapur për ta diskutuar.
“Javën e kaluar PD dhe LSI munguan dhe e shtynë dhe trumbetuan një ndryshim sistemi. Sot nuk thanë asgjë. Listat e hapura janë varianti më i mirë i mundshëm. Opozita jashtëparlamentare nuk duhet të ketë frikë nga qytetarët. Kjo opozitë jashtëparlamentare refuzon të mbrojë këtë ndryshim sistemi ndërkohë që PS është e hapur dhe lejon se si mund të procedojë në të ardhmen. Do i shkojmë deri në fund kësaj çështje që Listat e Hapura të fuqizojnë qytetarët. Opozita jashtëparlamentare nuk duhet të ketë frikë. Opozita të mos mbështesë iniciativën e PD për mos mbështetur ndryshimin e sistemit. Opozita nuk do konkurrencë. Nuk mund të mbrojmë një sistem që fuqizon vetëm kryetarët e partive. S’mund të mbrojmë një sistem që kryetarët të behen të gjithpushtetshëm. Propozova që jam pro depolitizimit të administratës publike dhe partitë të kenë një rol vëzhguesi dhe të kenë të drejtë apelimi. Këto ishin dy pikat kryesore. Ekspertët u mandatuan që të shikonin këto. Ne kemi propozim edhe nëse nuk kërkohet ndryshimi i Kushtetutës atëhere kemi një propozim tjetër që Listat e Hapura të vendosen pa ndodhur ndryshime Kushtetuese. Debati mbi ndryshimin e sistemit zgjedhor është qytetar pasi ka shkuar me 50 mijë firma. Nëse shkojmë tek debati që ka apo jo kohë atëhere kemi dy variantet për Kushtetutën. ”- tha Hajdari.
Ndërkohë, i mandatuari i PD për Këshillin Politik Oerd Bylykbashi është shprehu se partia që përfaqëson është e hapur për çdo propozim për ndryshimin e sistemit zgjedhor.
Bylykbashi deklaron se bashkëkryetari i Komisionit për Reformën Zgjedhore Damian Gjiknuri nuk mbështeti asnjë nga propozimet e Rudina Hajdarit që përfaqëson opozitën parlamentare. Më tej Bylykbashi u shpreh se PD kërkon një sistem me përfaqësues që të kenë lidhje të afërta me qytetarët.
”Në tryezën e sotme Gjiknuri ishte i qartë që nuk mbështeti asnjë nga propozimet për sistemin zgjedhor të znj,. Hajdari. Ndërkohë që opozita shprehu gatishmëri dhe të qenit të hapur për të diskutuar të gjithë propozimet. Janë qëndrime që janë shprehur edhe më herët. Z. Basha ka bërë një propozim shumë të fortë me vendosjen e një sistemi të ri me balanca kushtetuese që ndikojnë drejtpërdrejt. Zgjedhësit të kenë lidhjen më të afërt me të zgjedhurit. Pra deputetët mos jenë deputetë Facebook-u nga dhomat e tyre dhe zyrat. Por të jenë më lidhjet e tyre me qytetarët. Për këtë arsye jemi të hapur dhe diskutimi vazhdon. Nuk pamë asnjë qëndrim nga mazhoranca.”- tha Bylykbashi./ Opinion.al
