Zëdhënësja e PD-së Ina Zhupa akuzon bashkinë e Tiranës se po rrit ndotjen e qytetit e për pasojë rrezikun e vdekjes së qytetarëve.
Ne një status në “Facebook”, ajo shkruan se sipas BBC, një në katër vdekje në Shqipëri vjen nga ndotja e ajrit.
“Një në katër vdekje në Shqipëri vjen si pasojë e ndotjes së ajrit. Kështu raporton BBC, duke iu referuar një raporti të Agjencisë së Mjedisit të BE. Sipas raportit Shqipëria është një nga vendet ku numri i vdekjeve nga ndotja është rekord, gati 23 përqind e totalit te vdekjeve. Tirana është qyteti me ndotjen më të madhe, qyteti që po rrit përditë rrezikun e vdekjes së qytetareve të tij me ndotjen që vetëm shtohet si pasojë e betonizimit masiv dhe të pakufijshëm të saj.”, shkruan Ina Zhupa.
Ajo shton se duhet ndalur betonizimi i Tiranës duke bashkëngjitur në postimin e saj edhe një foto të kullave shumkatëshe që pritet të ndërtohen.
“Përkundrejt propagandës së Veliajt me pemë edhe me biçikleta, kemi një Tiranë që është betonizuar masivisht. Kullat janë bërë e zakonshme e zonës kryesore të qytetit të Tiranës. Ajri që ne thithim në Tiranë është i rrezikshëm për shëndetin tonë, është burim kanceri dhe burim vdekjeve. Për shëndetin e fëmijëve tanë, për shëndetin e prindërve tanë, për shëndetin tonë, duhet ndalur kthimi i Tiranës në qytetin e vdekjeve nga ndotja e ajrit, në qytetin e pajetueshëm nga betonizimi!”, deklaron Zhupa. /Opinion.al
