Opozita e ka nisur ditën e hënë më ndezjen e motorëve për protestën e radhës, atë të 13 Prillit. Lulzim Basha ka mbledhur grupin si dhe kryetarët e degëve për strategjinë e opozitës në lidhje me protestat.
Basha i ka porositur ish-deputetët dhe pjesëtarët e tjerë të PD që të bëjnë takime në terren me njerëzit për të përgatitur sa më mirë protestën kombëtare, por edhe protestave të tjera të të enjteve para Parlamentit.
“Të jeni më aktiv. Takime me qytetarët në terren për protestat që na presin. Intesifikoni takimet me qytetaret. Protesta çdo të enjte para, angazhim serioz për protestën kombëtare të 13 prillit. Nuk keni qene prezent sa duhet . Duhet të jeni më aktiv. Nuk duhet të rrini në kafe me njëri-tjetrin, por në ballë të protestës”, është shprehur Basha.
Nga ana tjetër, pas festës që kryeministri Rama i bëri opozitës, ai ka kërkuar këtë të hënë që të vazhdojnë takimet për zgjedhjet lokale. Në kryesinë e PS-së, Rama mësohet t’i ketë përgëzuar deputetët për mbarëvajtjen e seancës së fundit plenare, ku i kishte porositur për të mos diskutuar për opozitën në Parlament.
Të njëjtën gjë u ka kërkuar të bëjnë edhe këtë të enjte, duke kërkuar gjithashtu vëmendje të madhe të projektligjet që do të hidhen për votim, si ai i vetting-ut në polici. Gjithashtu Rama i ka bërë thirrje deputetëve dhe anëtarëve të kryesisë që të fillojnë përgatitjet për zgjedhjet vendore të 30 qershorit duke u përqendruar te zonat e tyre elektorale./Opinion.al
