Kryetari i Partisë Demokratike Lulzim Basha ka njoftuar mbylljen e protestës së sotme nga selia e Partisë Demokratike. Rreth orës 13:00, duke folur përballë protestuesve, Basha tha se të gjithë duhet ta kuptojnë se opozita nuk do të marrë pjesë në zgjedhje me kryeministër Edi Ramën.
“Kush nuk e ka dëgjuar nga hipokritët e kotur me paratë e narkokryeministrit, le ta dëgjojë, kush nuk e ka kuptuar le ta kuptojë mirë dhe qartë: Zgjedhje me Edi Ramën nuk do të ketë, pakt me Maduron nuk do të ketë. Kjo betejë ka nisur për çdo shqiptar. Zotohem sot para jush, se nuk ka forcë mbi tokë t’ju tradhtojë ju, të tradhtojë këtë lëvizje për liri dhe demokraci të standardeve evropiane. Do të bëhet realitet verdikti juaj, për një Shqipëri si gjithë Europa. Me ju në shi e në diell, në këmbë, në marshim, në përplasje do të jem gjithmonë unë, Partia Demokratike, opozita e bashkuar. Nuk do t’ju braktisim në ëndrrën tuaj më të bukur që fëmijët tuaj të gëzojnë begatinë evropiane, këtu në Shqipëri”, ka thënë Basha në përfundim të protestës që zgjati rreth tre orë e gjysmë.
Gjithashtu kryedemokrati kërkoi ndjesë për ata që u bënë milionerë në pushtetin e Partisë Demokratike, duke premtuar se nuk do të përsëriten gabimet e së shkuarës. “Respekt për të gjithë gazetarët, turp për pronarët oligarkë të mediave. Ndjesë për të gjithë ata që u bënë milionerë në pushtetin e Partisë Demokratike. Dua t’i kthej pësimet në mësime, për këtë zotohem sot para Zotit dhe jush”, deklaroi Basha.
