Këtë të hënë në orën 18:00 Partia Demokratike do të mbledhë Këshillin Kombëtar. Në mbledhjen e sotme pritet që të votohen emrat e skuadrës opozitare të Lulzim Bashës, të cilat u bën publike një ditë më parë.
Ndryshohen nënkryetarët e partisë, por mbetet Sekretari i Përgjithshëm Bardhi. Lulzim Basha u jep më shumë pushtet grave në Partinë Demokratike, të cilat do të drejtojnë poste kyçe dhe sekretariate të rëndësishme.
Nga ana tjetër të rinjtë në politikë, Oriela Nebiaj, Flutura Açka apo Arbi Agalliu marrin detyra politike edhe në parti.
Për herë të parë, Partia Demokratike do të ketë dy gra nënkryetare: Jorida Tabaku, nënkryetare përgjegjëse për marrëdhëniet me jashtë dhe Grida Duma, nënkryetare përgjegjëse për marrëdhëniet me shoqërinë civile.
Ndërkohë ish drejtori i Fushatës tashmë deputet i Tiranës, juristi Alfred Rushaj, do të jetë nënkryetar i PD dhe kryetar i Grupit Parlamentar ndërsa drejtuesi politik i Qarkut të Fierit dhe një politikan me përvojë Enkelejd Alibeaj, do të jetë kandidatura e PD për nënkryetar të Kuvendit, dhe njëkohësisht nënkryetar i PD.
Edi Paloka, do të propozohet për Kryetar të Këshillit Kombëtar të Partisë Demokratike. Ndërsa deputetja e zgjedhur, shkrimtarja e botuesja Flutura Açka është nominuar për një post të rëndësishëm, atë të Kryetares së Komisionit të Apelimit, Integritetit dhe Etikës.
Jemin Gjana, është nominuar si Kryetar i Komisionit Zgjedhor.
Për dy çështje parësore për Partinë Demokratike, ato të pronave dhe të përndjekurve, Lulzim Basha ka vendosur të ketë sekretariate të dedikuara, të cilat po kështu ju janë besuar grave.
Për Sekretare për Pronarët dhe çështjet e pronave, Basha ka nominuar Ledina Mandian, e cila vjen nga një përvojë e pasur juridike me një fokus të veçantë në këtë fushë. Ndërsa Jonila Godole, një prurje e re në Partinë Demokratike, do të jetë Sekretare për të Përndjekurit Politikë, fushë në të cilën ka një kontribut të madh prej shumë vitesh.
Basha ka krijuar edhe Sekretariatin për Klimën e Biznesit për të cilin është propozuar emri i Drejtuesit Politik të Qarkut Kukës, dhe sipërmarrësit Flamur Hoxha.
