Partia Demokratike ka mbledhur sot strukturat partiake e parlamentare për të diskutuar etapat e betejës opozitare si dhe zgjedhjet e brendshme në parti.
Të enjten e seancës plenare, kur në Kuvend do disktutohet projektbuxheti 2019-s, kreu i PD-së ka thirrur një tryezë bashkëbisedimi me të njëjtën temë, me përfaqësues të biznesit, ekspertë, grupe interesi e gazetarë.
Pjesë e diskutimit në mbledhjen e sotme ishte protesta e banorëve tek Unaza e Re, bashkë me vendimin që ajo të mbështetet në çdo kohë nga opozita.
Në mbledhjen ku merrnin pjesë edhe aleatët e PD-së, kreu i grupit parlamentar, Edmond Spaho, ka informuar mbi takimin me delegacionin e komisionit të Venecias për amendimin kushtetues të propozuar nga opozita, për Vettingun në politikë.
Zgjedhjet e brendshme në PD kanë qenë pika tjetër e diskutimit. Kryetari Basha ka kërkuar që procesi i zgjedhjes së kryetarëve të degëve të përfundojë brenda dy javëve.
Ky proces i paraprin Kuvendit kombëtar që do mbahet në 15 Dhjetor, e që do jetë zgjedhor për strukturat më të larta partiake. PD përgatitet që pas Kuvendit të nisë punën për ngritjen e shtabeve elektorale për zgjedhjet vendore të 30 Qershorit.
Me këtë strategji, opozita kombinon aksionin e vet politik me përgatitjet për vendoret e ardhshme.
“Ne duhet të diktojmë axhendën e vendit, siç kemi bërë deri tani”, mësohet të ketë thënë kryetari Lulzim Basha.
