Ministri i Drejtësisë, Ulsi Manja ka përshëndetur vendimin e opozitës shqiptare, për të mbështetur Amnistinë Penale.
Në një postim në rrjetet sociale, Manja shkruan se opozita ka mbështetur variantin e amnistisë të propozuar nga Ministria e Drejtësisë dhe Qeveria Shqiptare. Ai shton se në këtë variant nuk përfiton asnjë subjekt që është hetuar nga SPAK apo gjykuar nga GJKKO.
Ndër të tjera, Manja shprehet se amnistia do të marrë të enjten të gjitha votat e deputetëve.
“Përshëndes vendimin e opozitës për të miratuar më në fund Amnistinë Penale, e cila u vonua si asnjëherë tjetër nga axhenda politike të turbullta që e morën peng këtë akt kushtetues mëshire të shtetit, duke dëmtuar afro 700 përfituesit e kësaj aministie.
Me kënaqësi të veçantë konstatova se opozita mbështeti variantin e amnistisë së propozuar nga Ministria e Drejtësisë dhe Qeveria Shqiptare, ku as nuk bëhej fjalë për amnistimin e subjekteve të SPAK-ut e të Gjykatës Speciale.
Së fundmi nuk e fsheh dot kënaqësinë që siç e pata deklaruar publikisht për mediat përpara Kuvendit – kur turbullia e një pjese të parlamentit e bënte aministinë të dukej e pashpresë – Aministia Penale do të marrë të gjitha votat e deputetëve!
Nuk thotë kot populli, i duruari i fituari dhe le të shërbejë ky zhvillim pozitiv edhe për ata që s’kanë pse ikin më nga tavolina e punës, për të marrë rrugë të shkurtra që s’çojnë askund dhe si përfundim për t’i dalë gjatë rikthimit në tavolinë”,-shkruam Ulsi Manja.
