LSI është e hapur për të mbështetur PD për një reformë të re territoriale, që mund të çojë sërish në rritjen e numrit të njësive administrative.
Petrit Vasili, i cili ka qenë anëtar i komisionit që hartoi ndarjen territoriale, që e kufizoi numrin e bashkive në 61 nga 380 bashki dhe komuna në të gjithë vendin, thotë se është e hapur për një riorganizim të ri me këtë e kërkon Partia Demokratike.
“Rishikimi nuk është tabu. Ne nuk patëm tabu të rishikonim një kushtetutë në 64 nene. Në rast se kjo vjen, s’ka asnjë arsye të mos të ulemi në tavolinë dhe ta shohim, por besoj se është një thirrje e kotë në raport me këtë mazhorancë.”
Vasili përshëndet qëndrimin e Selisë Blu për t’u bërë bashkë në një front opozitar kundër mazhorancës socialiste, por thotë se nuk kanë vendosur ende modalitet për mënyrën sesi do të bashkëveprojnë.
“Nuk ka një negociatë në kuptimin ashtu siç do ta imagjinonit ju pra, zyrtare, formale. Por ka një pjekje të qartë të mendimit që një koordimnim më i mirë, në raport me një qeverisje që ka shkarë rrezikshëm në mosqeverisje të vendit kërkon sigurisht të ketë një sinkronizim tjetër politik dhe besoj se ky moment sinkronizimi është, ekziston.”
Ajo që i bashkon 2 partitë e opozitës kundër mazhorancës është kriminaliteti që sipas tyre është rritur nën qeverisjen e Edi Ramës duke kapur edhe kupolën drejtuese të Policisë së Shtetit.
